البوابة
للشاعر : مراد البرعصي
لوعة اللي مرهون..أتقلّل هَناك وتتركه للجّون
ثاريتها ..
**
لوعة اللي يتهايا..ساعة ملاَج العين للتغفايه
ويبقن أدموعك ياالعين سخايا..ولا النوم تغمضلك أمعاه أجفون
ويبقن أهدوبك بالدموع روايا..إيشلّن كما شلّة أعشَش قيطون
فى ثقلة أشتاء هلهن أقعود كبايا..فى عام ضمّ الناس للـ المقرون
ولا اتقول كانوا هَل أشوي وشلايا..وسكرة ضحاهم طلّقوا غيدون
ولا عزّهم فـ الكسب بأم حوايا..وهي عزّها مرباع جوف أردون
على كلّ سنّ اطّول فيه الغايه..سواء أثلوبها والاّ بنات لبون
وهلها مثاني هل كرَم وأعنايه..بالدّين يخشوا هزّة العرجون
يقوموا الليل مع بعض صلاّيه..ولايفخروا بالمال لا البَنون
ووان فجرهم تنعم أبطيب أقرايه..رواة حفص عن عاصم مع قالون
مارواه عن نافع أبطيب نوايا..ويتلوا ثلاث ويختموا بالنّون
واثقين مايرضوا أفعال ردايا..ولا وصفهم فى سورة الماعون
ولا امحصّنات أقذفوا بيض الرايه..ولايقربوا مُسكر ولا يزنون
ركّابة عريض الصدر بو أقبجايه..وافي الجّسد مقدر قصير أقيون
لايكسبوا نكسه ولاتكّايه..ولا هم وذايل يكسبوا الحَرون
ألحقنا بهم فى ساعة التوفايه..ياكريم يا مثني ثنا قارون
حتى أنكان فـ الظاهر أنقول أغنايه..ماني بمدعاهم خفاء مفتون
لوعة اللي عالعين ** غوالي وما غليوا إلا بالزين
علي ما تماشينا ايسار ايمين ** مالبردي امشرق لا جبا جبرون
وخذها امغرب فوت رقدالين ** ومنا امقبل لا جبل الحسون
ما ريت كيف اللي طناني نين** ذبلني ابوصف ومشيتا فصعون
وحتى كان مانوخذ ابسحر دفين **ولا حراز لو حصنن الها اندرون
متحصن بعالم سر ذي القرنين** وعدة اصحاب الكهف موش اضنون
وعالم بيوم الجمع يوم الدين** وكل يوم في شاناً وعالم شون
الروح بالجسد واقرب مالوتين ** الخاطر ابما قدر ارضي ممنون
ولا باب رزقي في غلاك رهين** ولا انريد باسمك ننكنى مجنون
لوعة اللي مرهون * اتشوي هناك وتكرها للجون * ثاريتا
لوعة اللي ابغلاه ** ابلينا وقدر نبتلوا ابخطاه
ويا من نصر عبده وكاد اعداه **وما فكهم منا منيع احصون
ويا من كسر هامان في طغواه** ويا من نصر موسى وخوه هارون
ويا من حما يوسف اكرم مثواه**ويا من قسم بالتين والزيتون
ويا من فلق حبه اوصل ابنواه** ولين اقلوباً ما مشت باليون
ويا قدير صبرني علي فرقاه** ويا من الرزق ابرادتك مضمون
لوعة اللي مرهون* اتشوي هناك وتكرها للجون * ثاريتا
لوعة اللي امحجور ** وغالي وجرحه بالدموم ايفور
ابرق الشفايف والعيون الحور ** سحرني ونا مريوع عقلي دون
كل العقول ان فيه نار اتثور ** يضايقبها يرقن عليه اغبون
يبقى ايمثل في جبا امهجور** بعد عز هل مالن عليه اقرون
كانن نواجع في هنا واسرور** وكل جار عالاخر شفيق حنون
وذرا عليهم ميل هالدهور** خلاهم سهاري كأن لم يكون
لوعة اللي مرهون * اتشوي هناك وتكرها للجون* ثاريتا
لوعة اللي خطار * وقتاً تهايوا نوم عيني طار
وايديرن اجروحي من عدم سطار** ونصبر ومر الصبر عالمكيون
يبقن ادموعي في خفا قطار** علي ناس مافيهم امقابل عون
متواصلات مالماقي الهن نهمار** كي ما وراهم ما نبع لثرون
وما شطهم دمعي ولا نحرار** بكايه اتحايي في غلا مدفون
لو كان غير ما زادوا العين امرار** علي امرارها شده انقول اتهون
الا نا امجرب لي فيه ادهار** اللي انقول موسى ينقلب فرعون
لوعة اللي مرهون * اتشوي هناك وتكرها للجون * ثاريتا
لوعة اللي غياب ** واغيابهم ابقيلي فالخفا شخشاب
حتى ان كنت جاحد لوعة المنشاب** وحال غايتي نكمى صنا الكانون
نوخذ ابجصر فيه كي الحراب**اللي شفيرهن سمم وهو مسنون
وهن سوادهن دلهيس كي الغراب** وحوّل هدب لا ظل لا مسحون
سريب غيرهم حتى ان عقلي جاب** امغير فالوسع ما هز فيه اركون
